List of Allu Arjun Movies in Telugu

అల్లు రామలింగయ్య మనవడిగా, అల్లు అరవింద్ తనయుడిగా సినీ పరిశ్రమలో అడుగుపెట్టారు అల్లు అర్జున్. బాలనటుడిగా వెండితెర మీద మొదటి సారి కనిపించిన అల్లు అర్జున్ ఆ తరువాత “మెగాస్టార్” చిరంజీవి నటించిన డాడీ చిత్రంలో ఒక చిన్న పాత్రలో మెరిశారు. డాన్స్ నేర్చుకునే కుర్రాడి పాత్రలో కాసేపు నటించారు.

ఆ తరువాత 2003 సంవత్సరారంలో కధానాయకుడిగా వరుసగా చిత్రాల్లో నటిస్తూ అందరి అభిమానాన్ని చొరగొంటూ తనకంటూ సినీ పరిశ్రమలో ప్రత్యేక స్థాన్నాన్ని సంపాదించుకున్నారు అల్లు అర్జున్. ఇప్పుడు అల్లు అర్జున్ నటించిన చిత్రాల గురించి తెలుసుకుందాం.

కధానాయకుడిగా తెరంగ్రేటం

ప్రముఖ “దర్శకేంద్రుడు” కె. రాఘవేంద్రరావు దర్శకత్వం వహించిన వందవ చిత్రం గంగోత్రి చిత్రంతో అల్లు అర్జున్ కధానాయకుడిగా పరిచయం అయ్యారు. ఈ చిత్రంలో కథానాయకిగా ప్రముఖ నటి ఆర్తి అగర్వాల్ సోదరి అదితి అగర్వాల్ నటించడం జరిగింది. ఈ చిత్రానికి ఎం. ఎం. కీరవాణి అందించిన సంగీతం ప్రేక్షకులని ఆకట్టుకుంది మరియు ఈ చిత్రం ఘన విజయం సాధించడంతో పాటు కొన్ని పురస్కారాలు వచ్చాయి.

సుకుమార్ దర్శకత్వంలో అల్లు అర్జున్ నటించిన రెండవ చిత్రం ఆర్య. దిల్ రాజు నిర్మించిన ఈ చిత్రం భారీ విజయం సాధించడంతో పాటు అల్లు అర్జున్ పాత్రకు మంచి పేరు తీసుకొచ్చింది. ఈ చిత్రంలో కథానాయకిగా అను మెహతా మరియు ప్రత్యేక పాత్రలో శివ బాలాజీ నటించారు. విభిన్నమైన ప్రేమ కధ నేపథ్యంలో వచ్చిన ఈ చిత్రం భారీ విజయం సాధించింది.

వన్ సైడ్ లవ్ అంటూ అల్లు అర్జున్ చేసిన అల్లరి ప్రేక్షకులను ఆకట్టుకుంది. దేవి శ్రీ ప్రసాద్ అందించిన సంగీతం ఇప్పటికి ప్రేక్షకులని అలరిస్తుంది, ముఖ్యంగా “ఆ అంటే అమలాపురం” పాట ప్రజాదరణ పొందటంతో పాటు ఆ పాటకి నృత్యం చేసిన అభినయశ్రీకి కూడా మంచి పేరు లభించింది.

వి. వి. వినాయక్ దర్శకత్వంలో అల్లు అర్జున్, గౌరీ ముంజల్ కలిసి నటించిన బన్నీ చిత్రం భారీ విజయంతో పాటు భారీ వసూళ్లను సాధించింది. ఈ చిత్రంతో “స్టైలిష్ స్టార్” అనే బిరుదు అల్లు అర్జున్ కి ఇవ్వడం జరిగింది. అలాగే హ్యాట్రిక్ విజయాలు సాధించిన కొంతమంది కధానాయకుల జాబితాలో అల్లు అర్జున్ చేరడం విశేషం.

కరుణాకరన్ దర్శకత్వంలో అల్లు అర్జున్, జెనీలియా డి సౌజ కలిసి నటించిన హ్యాపీ చిత్రం పరవాలేదనిపించింది. యువన్ శంకర్ రాజా అందించిన సంగీతం అలరించింది. సరదా సరదాగా సాగిపోయే ఈ చిత్రం ప్రేక్షకులను అలరిస్తుంది. ఈ చిత్రంలో అన్ని పాటలు ప్రజాదరణ పొందాయి ముఖ్యంగా “ఎగిరే మబ్బులలోన” పాట సంగీత ప్రియులని అలరిస్తుంది.

పూరి జగన్నాధ్ దర్శకత్వంలో అల్లు అర్జున, హన్సిక కలిసి నటించిన దేశముదురు చిత్రం భారీ విజయం సాధించడమే కాకూండా భారీ వసూళ్లు రాబట్టింది. ఈ చిత్రంలో అల్లు అర్జున్ ఆరు పలకల దేహంతో ప్రేక్షకులను అలరించారు. ఈ చిత్రంలో హాస్యనటులు అలీ, కోవైసరళ పండించిన హాస్యం ప్రేక్షకులను కడుపుబ్బా నవ్విస్తుంది. చక్రి అందించిన సంగీతం ప్రేక్షకులని ఊరుతలూగించగా పాటలు కూడా జనాదరణ పొందడం విశేషం. అల్లు అర్జున్ నటనతో పాటు దేశముదురు చిత్రానికి ఎన్నో పురస్కారాలు లభించడం విశేషం.

మరికొన్ని చిత్రాలు

భాస్కర్ దర్శకత్వంలో అల్లు అర్జున్, షీలా కలిసి నటించిన పరుగు చిత్రం విజయం సాధించింది. మణిశర్మ అందించిన సంగీతం అలరించగా అన్ని పాటలు ప్రేక్షకులను అలరించాయి. ప్రియుడితో వెళ్లిన కూతురి కోసం తండ్రి ప్రకాష్ రాజ్ ఎంత పరితపిస్తాడో ఎంత వెతుకుతారో ఈ చిత్రంలో మనం చూడొచ్చు.

సుకుమార్ దర్శకత్వంలో అల్లు అర్జున్, కాజల్ అగర్వాల్ కలిసి నటించిన ఆర్య – 2 చిత్రం అలరించింది. ఈ చిత్రంలో నవదీప్, శ్రద్ధాదాస్ ప్రత్యేకపాత్రలో నటించగా దేవి శ్రీ ప్రసాద్ సంగీతం అందించారు. సుకుమార్, అల్లు అర్జున్ కలయికలో వచ్చిన రెండవ చిత్రం ఆర్య – 2. ఈ చిత్రంలో పాటలతో పాటు అల్లు అర్జున్ చేసిన డాన్స్ ప్రేక్షకులను అలరించింది.

గుణశేఖర్ దర్శకత్వంలో అల్లు అర్జున్, భానుశ్రీ మెహ్రా కలిసి నటించిన వరుడు చిత్రం భారీ అంచనాలతో విడుదలై ప్రేక్షకులను నిరాశపరిచింది. ఐదు రోజుల పెళ్లి నేపధ్యం మీద వచ్చిన ఈ చిత్రంలో తమిళ నటులు ఆర్య ప్రతినాయకుడి పాత్ర పోషించారు. నరేష్, ఆశిష్ విద్యార్ధి, సుహాసిని ప్రత్యేక పాత్రలో నటించిన ఈ చిత్రం ప్రేక్షకులను ఆకట్టుకోలేకపోయింది.

క్రిష్ జాగర్లమూడి దర్శకత్వంలో అల్లు అర్జున్, మంచు మనోజ్ కుమార్, అనుష్క, దీక్ష సేథ్, మనోజ్ బాజ్పాయి కలిసి నటించిన వేదం చిత్రం విమర్శకుల ప్రశంసలు అందుకుంది. ఈ చిత్రంలో అల్లు అర్జున్ కేబుల్ రాజు అనే పాత్రలో నటించి మెప్పించారు. ఈ చిత్రంలో అల్లు అర్జున్ పేద వాడిగా ఉంటూ డబ్బులున్న వ్యక్తిగా చెప్పుకునే పాత్రలో నటించారు అలాగే రాక్స్టార్ పాత్రలో మంచు మనోజ్ కుమార్, పడుపు వృత్తి పాత్రలో అనుష్క నటించడం విశేషం. ఎం. ఎం. కీరవాణి అందించిన సంగీతం ప్రేక్షకులను అలరించింది.

2011 – 2020 మధ్య వచ్చిన చిత్రాలు

వి. వి. వినాయక్ దర్శకత్వంలో అల్లు అరవింద్ నిర్మాతగా అల్లు అర్జున్, తమన్నా భాటియా కలిసి నటించిన బద్రీనాథ్ చిత్రం అలరించింది.  ఎం. ఎం. కీరవాణి అందించిన సంగీతం మరియు పాటలు ప్రేక్షకులను అలరించింది. గురువు పాత్రలో ప్రకాష రాజ్, శిష్యుడి పాత్రలో అల్లు అర్జున్  నటించడం విశేషం. బద్రీనాథ్ గుడిని కాపాడే పాత్రలో అల్లు అర్జున్ నటించి మెప్పించారు.

త్రివిక్రమ్ సినివాస్ దర్శకత్వంలో అల్లు అర్జున్, రాజేంద్ర ప్రసాద్, కోట శ్రీనివాసరావు, రావు రమేష్, తనికెళ్ళ భరణి, ఇలియానా, సోను సూద్ కలిసి నటించిన జులాయి చిత్రం ఘన విజయం సాధించింది. 1500 వందల కోట్లు బ్యాంకు నుంచి దొంగతనం చేసిన సోను సూద్ అతని బృందాన్ని అల్లు అర్జున్ తన తెలివితేటలతో చాకచక్యంగా ఎలా పట్టించాడు అనేది ఈ చిత్ర నేపధ్యం.

జులాయి చిత్రానికి దేవి శ్రీ ప్రసాద్ అందించిన సంగీతం ప్రేక్షకులను అలరించడమే కాకుండా పాటలు కూడా ప్రేక్షకులను అలరించాయి. పూరి జగన్నాధ్ దర్శకత్వంలో అల్లు అర్జున్, అమల పాల్, క్యాథెరిన్ థెరెసా కలిసి నటించిన ఇద్దరమ్మాయిలతో చిత్రం ఆశించిన విజయం సాధించలేదు. ఈ చిత్రానికి దేవి శ్రీ అందించిన సంగీతం అలరిస్తుంది.

అల్లు అర్జున్, కాజల్ అగర్వాల్ ప్రత్యేక పాత్రలో నటించిన ఎవడు చిత్రం ఘన విజయం సాధించింది. వంశీ పైడిపల్లి దర్శకత్వంలో దిల్ రాజు నిర్మాణంలో రాంచరణ్, శృతి హస్సన్ కలిసి నటించిన ఈ చిత్రం భిన్నమైన కధ నేపధ్యం మీద చిత్రీకరించడం జరిగింది. ప్రముఖ నటి జయసుధ ఈ చిత్రంలో రామ్ చరణ్ తల్లిగా వైద్యురాలి పాత్రలో నటించడం విశేషం.

ఈ చిత్రంలో ఒక సన్నివేశంలో రామ్ చరణ్ చనిపోగా అల్లు అర్జున్ చావు బతుకుల్లో ఉండగా వారిద్దరిని ఆసుపత్రికి తీసుకెళ్లి ప్లాస్టిక్ సర్గరీతో అల్లు అర్జున్ ని రామ్ చరణ్ లా మారుస్తారు వైద్యురాలి పాత్ర పోషించిన జయసుధ. ఆ తరువాత జరిగే సంఘటనలు ప్రేక్షకులను అలరిస్తాయి మరియు ఈ చిత్రంలో “డైలాగ్ కింగ్” సాయి కుమార్ ప్రతినాయకుడి పాత్రలో నటించి భయపెట్టారు. ఈ చిత్రానికి దేవి శ్రీ ప్రసాద్ అందించిన సంగీతం అలరించింది.

మరికొన్ని చిత్రాలు

సురేందర్ రెడ్డి దర్శకత్వంలో అల్లు అర్జున్, శ్యామ్, శృతి హస్సన్ కలిసి నటించిన చిత్రం రేసు గుర్రం మరియు సలోని ఈ చిత్రంలో ప్రత్యేకపాత్రలో నటించారు. ఎస్. ఎస్. థమన్ అందించిన సంగీతంతో పాటు ఈ చిత్రం భారీ విజయం సాధించింది. ఈ చిత్రంలో పోలీస్ పాత్రలో అన్న శ్యామ్, అల్లరి చేస్తూ తిరిగే తమ్ముడి పాత్రలో అల్లు అర్జున్ నటించడం జరిగింది. సరదా సరదాగా సాగిపోయే ఈ చిత్రం ప్రేక్షకులను అలరిస్తుంది. ఈ చిత్రంలో హాస్య నటులు బ్రహ్మానందం చేసిన నటన అద్భుతం అని చెప్పుకోవచ్చు.

త్రివిక్రమ్ శ్రీనివాస్ దర్శకత్వంలో అల్లు అర్జున్, సమంత, నిత్యా మీనన్, అదాశర్మ కలిసి నటించిన సన్ అఫ్ సత్యమూర్తి చిత్రం పరవాలేదనిపించింది. ప్రకాష్ రాజ్, రావు రమేష్, రాజేంద్ర ప్రసాద్, ఉపేంద్ర, స్నేహ ప్రత్యేక పాత్రలో నటించిన ఈ చిత్రానికి దేవి శ్రీ ప్రసాద్ సంగీతం అందించారు. తండ్రి మర్యాద, గౌరవాన్ని కాపాడుతూ, తండ్రి నేర్పిన విలువలు పాటించే తనయుడిగా అల్లు అర్జున్ నటించారు.

గుణశేఖర్ దర్శకత్వంలో అనుష్క, రానా దగ్గుబాటి, కృష్ణంరాజు, ప్రకాష్ రాజ్, సుమన్ కలిసి నటించిన చిత్రం రుద్రమ్మదేవి. కాకతీయ సామ్రాజ్య మహారాణి రుద్రమ్మదేవి చరిత్ర మీద తీసిన ఈ చిత్రంలో అనుష్క రుద్రమ్మదేవి పాత్రలో, వీరభద్రుడిగా రానా దగ్గుబాటి నటించారు. గోనగన్నారెడ్డి పాత్రలో అల్లు అర్జున్ నటించి మెప్పించారు. ఈ చిత్రానికి ఇళయరాజా సంగీతం అందించడం విశేషం.

బోయపాటి శీను దర్శకత్వంలో అల్లు అర్జున్, శ్రీకాంత్, సాయి కుమార్, రకుల్ ప్రీత్ సింగ్, క్యాథెరిన్ థెరిస్సా నటించిన సరైనోడు చిత్రం భారీ విజయం సాధించింది మరియు ఈ చిత్రంలో ఆది పినిశెట్టి ప్రతినాయకుడి పాత్రలో నటించడం విశేషం. ఎస్. ఎస్. థమన్ అందించిన సంగీతం ప్రేక్షకులను అలరించింది.

ఇంకొన్ని చిత్రాలు

హరీష్ శంకర్ దర్శకత్వంలో అల్లు అర్జున్, పూజ హెగ్డే కలిసి నటించిన డిజె: దువ్వాడ జగన్నాధం చిత్రం ప్రేక్షకులను ఆకట్టుకోలేకపోయింది. బ్రాహ్మణుడి పాత్రలో పౌరోహిత్యం చేస్తూ మరో వైపు సిఐ పురుషోత్తంతో కలిసి దుండగులను హతమార్చే పాత్రలో నటించారు అల్లు అర్జున్. ఈ చిత్రానికి దేవి శ్రీ ప్రసాద్ అందించిన సంగీతం అలరించింది.

వక్కంతం వంశీ దర్శకత్వంలో అల్లు అర్జున్, అను ఇమ్మాన్యుయేల్ కలిసి నటించిన నాపేరు సూర్య నా ఇల్లు ఇండియా చిత్రం నిరాశపరిచింది. ఈ చిత్రంలో యాక్షన్ కింగ్ అర్జున్ ప్రత్యేక పాత్రలో అల్లు అర్జున్ తండ్రిగా నటించడం విశేషం. ఇండియన్ ఆర్మీ నేపథ్యంలో సోల్జర్ పాత్రలో ఎప్పు కోపంగా ఉండే పాత్రలో అల్లు అర్జున్ నటించారు. ఈ చిత్రానికి విశాల్ శేఖర్ సంగీతం అందించగా నేపధ్య సంగీతం మాత్రం జాన్ స్టీవర్ట్ ఎదురి అందించారు.

త్రివిక్రమ్ శ్రీనివాస్ దర్శకత్వంలో అల్లు అర్జున్, సుశాంత్, పూజ హెగ్డే, నివేద పేతురేజ్ కలిసి నటించిన అలా వైకుంఠపురంలో చిత్రం భారీ విజయం సాధించింది. ఈ చిత్రంలో రాజేంద్ర ప్రసాద్, జయరాం, సముద్రఖని, సచిన్ ఖేద్కర్, సునీల్, మురళీ శర్మ, టబు, రోహిణి, నవదీప్ లాంటి భారీ తారాగణంతో రూపొందించిన ఈ చిత్రం ప్రేక్షకులను అలరించింది. అప్పుడే పుట్టిన పిల్లల్ని నర్స్ సహాయంతో మురళి శర్మ మార్చడం ఆ తరువాత వచ్చే సన్నివేశాలు అలరిస్తాయి. ఎస్. ఎస్. థమన్ అందించిన సంగీతంతో పాటు పాటలు మరియు నేపధ్య సంగీతం కూడా  ప్రేక్షకులను అలరించడం విశేషం.

పాన్ ఇండియా చిత్రం

ఆర్య, ఆర్య 2 చిత్రాల తర్వాత అల్లు అర్జున్ మరియు దర్శకుడు సుకుమార్ కలయికలో వచ్చిన చిత్రం పుష్ప: ది రైజ్. రష్మిక మందన కథానాయకిగా నటించిన ఈ చిత్రంలో అల్లు అర్జున్ నటించారు అనడం కంటే జీవించారు అని చెప్పాలి. ఎర్ర చందనం స్మగ్లింగ్ చేసే పాత్రలో అల్లు అర్జున్ చేసిన నటనకి ప్రేక్షకులు బ్రహ్మరధం పట్టడం జరిగింది.

పుష్ప: ది రైజ్ చిత్రంలో సునీల్, అనసూయ, రావు రమేష్ ప్రత్యేక పాత్రలో నటించగా ఎస్. పి. పాత్రలో ప్రముఖ మలయాళ నటులు ఫహద్ ఫాజిల్ భన్వార్ సింగ్ షెకావత్ పాత్రలో నటించారు అంతేకాకుండా ఈ చిత్రంలో ప్రముఖ నటి సమంత ప్రత్యేక పాటలో అలరించారు.

పుష్ప: ది రైజ్ చిత్రం తెలుగులోనే కాకుండా తమిళ్, మలయాళం, కన్నడ, హిందీ భాషలలో కూడా విడుదలై భారీ విజయాన్ని అందుకుంది. ఇప్పుడు పుష్ప: ది రైజ్ చిత్రానికి రెండవ భాగం పుష్ప 2: ది రూల్ చిత్రం విడుదలై భారీ వసూళ్ళని సృష్టిస్తూ సంచలనం సృష్టిస్తుంది. తెలుగు, తమిళ్, మలయాళం, కన్నడ, హిందీ భాషలతో పాటు బెంగాలీ భాషలో కూడా ఈ చిత్రం విడుదలై సంచలనం సృష్టించింది. ఈ చిత్రంలో శ్రీ లీల ప్రత్యేక పాటలో నటించడం విశేషం.

అల్లు అర్జున్ గురించి మరి కొన్ని విశేషాలు

• సంవత్సరానికి ఒక చిత్రం చేసే అల్లు అర్జున్ 2010 సంవత్సరంలో మాత్రం రెండు చిత్రాలు విడుదల చేయడం జరిగింది.
• గుణశేఖర్ దర్శకత్వంలో వచ్చిన వరుడు మరియు క్రిష్ జాగర్లమూడి దర్శకత్వంలో వచ్చిన వేదం చిత్రాలు ఒకే సంవత్సరంలో విడుదలయ్యాయి.
• కేరళ రాష్ట్రంలో అల్లు అర్జున్ ని “మల్లు” అర్జున్ అని అభిమానులు పిలుచుకుంటారు.
• గుణశేఖర్ దర్శకత్వంలో వచ్చిన రుద్రమ్మదేవి చిత్రంలో గోన గన్న రెడ్డి పాత్రలో నటించి అందరిని ఆశ్చర్యపరిచారు.
• ఇన్ని సంవత్సరాల జాతీయ సినీ పురస్కారాల్లో మొదటి సారి తెలుగు కథానాయకుడికి ఉత్తమ నటుడు పురస్కారం రావడం జరిగింది. పుష్ప చిత్రానికి ఈ పురస్కారం లభించింది.
• “స్టైలిష్ స్టార్” బిరుదుతో పాటు “ఐకాన్ స్టార్” అనే బిరుదు కూడా అభిమానులు ఇవ్వడం జరిగింది.
• హైదరాబాద్ లోని అమీర్పేట్ లో ఉన్న సత్యం థియేటర్ ను AAA సినిమాస్ గపేరుతొ పునర్నిర్మించడం జరిగింది.
• “ఐ యాం దట్ చేంజ్” అనే సామజిక భాద్యత ఉన్న షార్ట్ ఫిలిం లో నటించారు అల్లు అర్జున్ .

వ్యక్తిగతం

చెన్నై నగరంలో 1982 సంవత్సరం ఏప్రిల్ 8న అల్లు వారి కుటుంబంలో జన్మించారు అల్లు అర్జున్. తాతయ్య ప్రసిద్ధి హాస్యనటులు మరియు తండ్రి నిర్మాత అల్లు అరవింద్. అల్లు అర్జున్ కి ఒక అన్నయ్య అల్లు వెంకటేష్ మరియు ఒక తమ్ముడు అల్లు శిరీష్ ఉన్నారు. ప్రముఖ నటుడు “మెగాస్టార్” చిరంజీవి అల్లు అర్జున్ కి స్వయానా మేనమామ అవుతారు.

తెలుగు సినీ పరిశ్రమ హైదరాబాద్ రావడంతో అల్లు అర్జున్ చదువంతా ఇక్కడే సాగింది. 2011 సంవత్సరం మార్చ్ 6న అల్లు అర్జున్ వివాహం స్నేహ రెడ్డితో జరిగింది, వీరిది ప్రేమ వివాహం మరియు వీరికి ఒక కుమారుడు ఒక కుమార్తె.

అల్లు అర్జున్ నటించిన చిత్రాల గురించి తెలుసుకుందాం

బాలనటుడిగా:

1. విజేత
2. స్వాతిముత్యం

కధానాయకుడిగా:

1. డాడీ (అతిధి పాత్ర)
2. గంగోత్రి
3. ఆర్య
4. బన్నీ
5. హ్యాపీ
6. దేశముదురు
7. శంకర్ దాదా జిందాబాద్ (పాటలో అతిధి పాత్ర)
8. పరుగు
9. ఆర్య 2
10. వరుడు
11. వేదం
12. బద్రీనాథ్
13. జులాయి
14. ఇద్దరమ్మాయిలతో
15. ఐ ఆమ్ దట్ చేంజ్ (షార్ట్ ఫిలిం)
16. ఎవడు
17. రేసుగుర్రం
18. సన్ అఫ్ సత్యమూర్తి
19. రుద్రమ్మదేవి
20. సరైనోడు
21. దువ్వాడ జగన్నాధం
22. నా పేరు సూర్య నా ఇల్లు ఇండియా
23. అలా వైకుంఠపురంలో
24. పుష్ప: ది రైజ్
25. పుష్ప: ది రూల్