భారత్ దేశంలో క్రికెట్ ఆటని ఒక క్రీడల కాకుండా మతం లాగ, ఆటగాళ్ళని దైవాలుగా కొలుస్తారు మన భారత ప్రేక్షకులు. ఢిల్లీ నుంచి గల్లీ వరకు క్రికెట్ అభిమానులు క్రికెట్ ఆడుతూ మనకు కనిపిస్తూనే ఉంటారు. కొంతమంది సరదా కోసం క్రికెట్ ఆడితే ఇంకొంతమంది జాతీయ జట్టులో చోటు సంపాదించి అందరి ద్రుష్టిని ఆకర్షించాలని చూస్తారు.
మరి అందరి దృష్టిని ఆకర్షించాలంటే ఎం చేయాలి అలాగే జాతీయ జట్టులో చోటు సంపాదించాలంటే ఎం చేయాలి, ఎవరు ఎంపిక చేస్తారు ఎలా ఎంపిక చేస్తారు ఈ విషయాలన్నీ ఇప్పుడు తెలుసుకుందాం. భారత జాతీయ క్రికెట్ జట్టులో చోటు సంపాదించాలంటే ముందుగా సాధన చేసి, శిక్షణ తీసుకుని ఆ తరువాత క్లబ్ క్రికెట్ తరుపున ఆడాలి, అక్కడ మన ఆటతీరు చూసి నచ్చితే కొన్ని టోర్నమెంట్లలో ఆడే అవకాశం ఇస్తారు, అక్కడ మనం మంచి ప్రతిభ కనబరిస్తే డొమెస్టిక్ క్రికెట్ టోర్నమెంట్లో మన పేరుని సిఫార్సు చేయడం జరుగుతుంది.
డొమెస్టిక్ క్రికెట్ అంటే ఏంటి
మన భారత దేశంలో కొన్ని క్రికెట్ టోర్నమెంట్లు ప్రతి సంవత్సరం జరుగుతూ ఉంటాయి, రంజీ ట్రోఫీ క్రికెట్ టోర్నమెంట్, దులీప్ ట్రోఫీ, డియోధార్ ట్రోఫీ, ఇరానీ కప్ మరియు మరి కొన్ని ట్రోఫీ లేదా టోర్నమెంట్లు జరుగుతాయి. ఈ టోర్నమెంట్ జిల్లాల వారీగా రాష్ట్రాల వారీగా జరుగుతాయి. ఇక్కడ మన ప్రతిభ కనబరిచి, మన ఆటతీరుని చూపించి, వచ్చిన అవకాశాలని సద్వినియోగం చేసుకుంటే జాతీయ జట్టు నుండి కబురు ఖచ్చితంగా వస్తుంది.
మరి ఇన్ని టోర్నమెంట్లు ఎప్పుడు మొదలు పెట్టారు, ఎవరు మొదలు పెట్టారు, ముందు ఏ టోర్నమెంట్ మొదలుపెట్టారు, వాటి వివరాలేంటి ఇప్పుడు తెలుసుకుందాం.
భారత డొమెస్టిక్ క్రికెట్ లేదా ఫస్ట్ క్లాస్ క్రికెట్ అంటే గుర్తొచ్చేది మొదటగా రెంజి ట్రోఫీ. మరి రంజీ ట్రోఫీ అంటే ఏంటి, ఆ టోర్నమెంట్ ఎక్కడ నిర్వహిస్తారు, ఎవరు నిర్వహిస్తారు, ఆ టోర్నమెంట్లో ఆడే జట్లు, ఆ ట్రోఫీ వెనుక వివారాలు మరియు నియమ నిబంధనల గురించి ఇప్పుడు క్లుప్తంగా తెలుసుకుందాం.
రంజీ ట్రోఫీ అంటే ఏంటి
“ది క్రికెట్ ఛాంపియన్షిప్” పేరుతొ “బి.సి.సి.ఐ” 1934 సంవత్సరంలో “ఫస్ట్ క్లాస్ క్రికెట్” ప్రారంభించింది, తరువాత 1935 సంవత్సరంలో “రంజీ ట్రోఫీ” పేరుతో మార్చడం జరిగింది. అప్పటినుంచి ఆ పేరుతోనే ఆడటం మొదలు పెట్టారు. భారత దేశంలో ఉన్న రాష్ట్రాలు, నగరాలు మరియు కేంద్ర పాలిత ప్రాంతాలు వాటికి అనుసంధానంగా ఉండే “క్రికెట్ అసోసియేషన్” ఈ రంజీ ట్రోఫీ లో పాల్గొంటాయి. 28 రాష్ట్రాలు 8 కేంద్ర పాలిత ప్రాంతాలు మరియు ప్రైవేట్ సంస్థలతో కూడిన 2 జట్లు ఈ ట్రోఫీ లో పాల్గొంటాయి.
రంజీ ట్రోఫీ పేరు మార్పుకి కారణం ఏంటి
“రంజిత్ సింహ్జి” అనే వ్యక్తి చదువుల కోసం ఇంగ్లాండ్ దేశం వెళ్లి అక్కడ చదువుకుంటూ క్రికెట్ ఆడటం మొదలుపెట్టారు. ఇంగ్లాండ్ దేశం తరపున అంతర్జాతీయ క్రికెట్ ఆడారు. ఇంగ్లాండ్ జట్టు తరుపు నుంచి 1896 సంవత్సరం నుంచి 1902 సంవత్సరం వరకు ఆడటం జరిగింది. భారత దేశం నుంచి క్రికెట్ ఆడిన మొట్ట మొదటి భారతీయుడు కాబట్టి తన పేరు పెట్టడం జరిగింది.
1934 సంవత్సరం లో మద్రాస్ (ఇప్పటి చెన్నై) నగరంలో చెపాక్ మైదానంలో మద్రాస్ మరియు మైసూర్ నగరాల మధ్య మొదటి మ్యాచ్ జరిగింది, ఆ మ్యాచ్ విజేతగా మద్రాస్ నిలిచింది. ఇన్నింగ్స్ తేడా మరియు 23 పరుగుల తేడాతో మద్రాస్ జట్టు గెలవడం విశేషం. ఆ సీజన్ ముగిసే సమయానికి ముంబై జట్టు రంజీ ట్రోఫీ క్రికెట్ టోర్నమెంట్ గెలవడం జరిగింది.
“పాటియాలా మహారాజు” భూపేందర్ సింగ్ ఆ ట్రోఫీని అందించడం విశేషం. “నవనగర్ జామ్ సాహెబ్” కుమార్ శ్రీ రంజిత్ సింహ్జి గారి గుర్తుగా ఈ ట్రోఫీ ఇవ్వడం జరిగింది. ఆ తరువాత ఈ టోర్నమెంట్ ప్రతీ సంవత్సరం విరామం లేకుండా సాగింది, కానీ మధ్యలో కొరోనా కాలంలో మాత్రమే ఈ ట్రోఫీ జరగలేదు.
రంజీ ట్రోఫీ ఫార్మటు
రంజీ ట్రోఫీ ప్రారంభించినప్పుడు నాలుగు జోన్లు కూడిన జట్లని ప్రకటించారు. ఉత్తరం, దక్షిణం, పశ్చిమ మరియు తూర్పు జోన్లు ఉన్న జట్లతో ఆడటం ప్రారంభించారు. కొన్ని సంవత్సరాల తరువాత మరో జోన్ వచ్చి చేరింది అదే సెంట్రల్ జోన్ పేరుతొ కూడిన జట్టు ఈ ట్రోఫీ లో భాగమైంది. ముందు లీగ్ దశ ఆ తరువాత నాకౌట్ దశ ఆ తరువాత ఫైనల్ మ్యాచ్ జరుగుతుంది.
1957-1958 సంవత్సరం నుంచి రౌండ్ రాబిన్ లీగ్ ఆడటం మొదలుపెట్టారు. అక్కడి నుంచి నాకౌట్ దశ ఆ తరువాత ఫైనల్. 1970-1971 సంవత్సరం నుండి 2001-2002 సంవత్సరాల వరకు జోన్లు వారీగా ఆడుతూ రౌండ్ రాబిన్ లీగ్, నాకౌట్ దశ ఆ తరువాత ఫైనల్ మ్యాచ్ ఇలా ఆడటం ప్రారంభించారు.
కొత్త ఫార్మటు
2002-2003 సంవత్సరం నుంచి రంజీ ట్రోఫీ ఫార్మటులో మార్పులు చేశారు. ఉత్తరం, దక్షిణం, పశ్చిమ మరియు తూర్పు జోన్లుగా ఉన్న జట్లతో పాటు సెంట్రల్ జోన్ జట్టుని కూడా రద్దు చేసి మరో కొత్త పద్దతిలో ఈ ఫార్మటు ఆడటం మొదలుపెట్టారు. 28 జట్లలో 15 జట్లని “ఎలైట్” పేరుతొ రెండు గ్రూపులు “ప్లేట్” పేరుతొ రెండు గ్రూపులుగా విభజించి ఆడటం మొదలుపెట్టారు.
ఎప్పటిలాగే రౌండ్ రాబిన్ లీగ్ పేరుతొ ప్రతి జట్టు తమ గ్రూప్ లో ఉన్న అన్ని జట్లతో ఆడతాయి. ఆ తరువాత నాకౌట్ దశ ప్రారంభం అవుతుంది. ఆ నాకౌట్ దశలో చెరో రెండు గ్రూపుల్లో మొదటి రెండు స్థానాల్లో నిలుస్తారో వారు సెమీఫైనల్, అందులో గెలిచినా వారు ఫైనల్ ఆడటం జరుగుతుంది. 2006-2007 సంవత్సరం లో “సూపర్ లీగ్” పేరుతొ రెండు గ్రూపులు మరియు “ప్లేట్ లీగ్” పేరు తో రెండు గ్రూపులు విభజించబడ్డాయి.
2008-2009 సంవత్సరాలలో “సూపర్ లీగ్” ముందుగా ఈ కొత్త ఫార్మటుతో ఆడటం మొదలు పెట్టింది. ఆ తరువాత 2010-2011 సంవత్సరాలలో “ప్లేట్ గ్రూప్” కూడా ఈ ఫార్మటు లో వచ్చి చేరింది. 2012-2013 సంవత్సరాలలో మరో సారి ఫార్మటుని మార్చడం జరిగింది. సూపర్ లీగ్, ప్లేట్ లీగ్ పేర్లు మార్చి “గ్రూప్ ఏ, గ్రూప్ బి” మరియు “గ్రూప్ సి” పేర్లతో ఆడటం మొదలుపెట్టారు.
2017-2018 సంవత్సరాలలో మళ్ళీ నాలుగు గ్రూపులని తీసుకొచ్చారు, “గ్రూప్ ఏ, గ్రూప్ బి, గ్రూప్ సి” మరియు “గ్రూప్ డి” ని చేర్చడం జరిగింది. 2018-2019 మరియు 2019-2020 సంవత్సరాలలో మరో సారి ఫార్మటు మార్చి “గ్రూప్ ఏ, గ్రూప్ బి, గ్రూప్ సి” తో పాటు “ప్లేట్ గ్రూప్” ని చేర్చడం జరిగింది. ఆ తరువాత 2021-2022 సంవత్సరంలో 9 గ్రూపులుగా విభజించడం జరిగింది.
“గ్రూప్ ఏ, గ్రూప్ బి, గ్రూప్ సి, గ్రూప్ డి, గ్రూప్ ఇ, గ్రూప్ ఎఫ్, గ్రూప్ జి, గ్రూప్ హెచ్” మరియు “ప్లేట్ గ్రూప్”. 2022-2023 సంవత్సరంలో మళ్ళీ “గ్రూప్ ఏ, గ్రూప్ బి, గ్రూప్ సి, గ్రూప్ డి” తో పాటు “ప్లేట్ గ్రూప్” ని చేర్చడం జరిగింది. ఇలా రకరకాల ఫార్మాట్లని మారుస్తూ రంజీ ట్రోఫీ నిర్వహిస్తున్నారు.
రంజీ ట్రోఫీ గురించి మరికొన్ని విశేషాలు
- రంజీ ట్రోఫీ మ్యాచ్లు అన్ని టెస్ట్ మ్యాచ్ పద్దతిలో జరుగుతాయి.
- రౌండ్ రాబిన్ లీగ్ మ్యాచ్లు నాలుగు రోజులు జరుగుతాయి ఆ తరువాత నాకౌట్ మ్యాచ్లు ఫైనల్ మ్యాచ్లు మాత్రం ఐదు రోజులు జరుగుతాయి.
- ఈ నాకౌట్ మరియు ఫైనల్ మ్యాచ్లలో ఖచ్చితంగా ఒక విజేత ఉంటారు.
- ఒకవేళ మ్యాచ్ డ్రా అవ్వడం జరిగితే మొదటి ఇన్నింగ్స్ లో ఏ జట్టైతే ఎక్కువ పరుగులు సాధిస్తుందో వారినే విజేతగా ప్రకటిస్తారు.
- ఎక్కువ రంజీ ట్రోఫీ గెలిచినా జట్టుగా ముంబై జట్టు రికార్డు సాధించింది, మొత్తం 41 సార్లు ముంబై జట్టు ట్రోఫీ గెలిచారు.
- ఎక్కువ పరుగులు (12,308) సాధించిన ఆటగాడిగా వసీం జాఫర్ రికార్డు సృష్టించారు.
- ఎక్కువ మ్యాచ్లు (155) ఆడిన ఆటగాడిగా కూడా వసీం జాఫర్ ముందున్నారు.
- ఎక్కువ శతకాలు (40) సాధించిన ఆటగాడిగా కూడా వసీం జాఫర్ ముందున్నారు
- ఎక్కువ వికెట్లు (640) పడగొట్టిన బౌలర్ రాజిందర్ గోయెల్ ముందున్నారు.
- ప్రేమంగ్సు ఛటర్జీ ఒకే ఇన్నింగ్స్ లో 10 వికెట్లు తీసిన బౌలర్ గా రికార్డు సృష్టించారు.
రంజిత్ సింహ్జి ఎవరు
రంజిత్ సింహ్జి సెప్టెంబర్ 10, 1872 సంవత్సరంలో సదోడర్ ప్రాంతం, నవనగర్ రాష్ట్రంలో, పశ్చిమ భారత ప్రావిన్స్, రాజపుట్ కుటుంబంలో జన్మించారు. వీరిది రాజుల కుటుంబం మరియు రంజిత్ సింహ్జి తాతగారు ఝాలం సింహ్జి, నవనగర్ రాష్ట్రాన్ని పరిపాలించేవారు. రంజిత్ సింహ్జి తండ్రి ఒక రైతు. రాజ్ కుమార్ కళాశాలలో రంజిత్ సింహ్జి చదువుకున్నారు.
క్రికెట్ పరిచయం
పాఠశాల వయసులోనే క్రికెట్ ఆడి జట్టుకి సారధ్యం వహించారు రంజిత్ సింహ్జి. కొన్ని సంవత్సరాలు సారధిగా ఉంటూ పాఠశాలలో జరిగే మ్యాచ్ లలో శతకాలు సాధించినా కూడా తన మనసు మాత్రం టెన్నిస్ మీద ఎక్కువ ఇష్టం చూపించేది. 1886 సంవత్సరంలో రంజిత్ సింహ్జి మరో ఇద్దరు విద్యార్థులు తమ కళాశాల ప్రిన్సిపల్ తో కలిసి చదువుకోడానికి లండన్ వెళ్లారు.
అక్కడ సర్రే కౌంటీ క్రికెట్ క్లబ్ తరుపున క్రికెట్ ఆడారు రంజిత్ సింహ్జి. ఆస్ట్రేలియా జట్టు మీద ఆడిన మ్యాచ్లో శతకం సాధించి అందరి ద్రుష్టి తన వైపు తిప్పుకున్నారు, ముఖ్యంగా ఆస్ట్రేలియా దిగజ్జ బౌలర్ చార్లెస్ టర్నర్ మెచ్చుకోవడం విశేషం. క్రికెట్, టెన్నిస్, బిలియర్డ్స్ మరియు ఫోటోగ్రఫీలో ఇష్టాన్ని కనబరిచేవారు రంజిత్ సింహ్జి.
ఇంగ్లాండ్ దేశంలోని కేంబ్రిడ్జి విశ్వవిద్యాలయంలో చదువుకున్నారు కానీ చదువుల్లో కాకుండా ఆటల మీద ఇష్టం ఎక్కువ ఉండటంతో డిగ్రీ పట్టా పొందలేకపోయారు. 1890 సంవత్సరం వేసవిలో కళాశాలకి సెలవు పెట్టి బౌర్నెమౌత్ అనే నగర పర్యటనకి వెళ్లడం జరిగింది. అక్కడ రంజిత్ సింహ్జి క్రికెట్ మీద ఎక్కువ ఆసక్తి కలగడంతో స్థానిక మ్యాచ్లు ఆడి విజయం సాధించారు.
ఆట పరంగా అంతా బాగున్నాకూడా సాంకేతికంగా ఇంకా మెరుగవ్వాలి అని అనుకున్నారు రంజిత్ సింహ్జి. 1891 సంవత్సరంలో కేంబ్రిడ్జిషైర్ కౌంటీ క్రికెట్ క్లబ్లో చేరి క్రికెట్ ఆడటం మొదలుపెట్టారు రంజిత్ సింహ్జి.
బ్యాట్టింగ్ సూచనలు
రంజిత్ సింహ్జి తన బ్యాటింగ్ మెరుగు పరుచుకోవడానికి ఫస్ట్ క్లాస్ క్రికెటర్ డేనియల్ హేవార్డ్ దెగ్గర సూచనలు తీసుకోవడం, ఆటలో మెళకువలు నేర్చుకోవడం మొదలుపెట్టారు. ఆ సూచనలు పాటిస్తూ రంజిత్ సింహ్జి బ్యాటింగ్ మెరుగుపరుచుకుని ఆ సంవత్సరం పరుగుల వరద సృష్టించారు. రంజిత్ సింహ్జి ఎంత గొప్పగా ఆడిన కూడా కొంతమంది ఆటగాళ్లు సంతృప్తి చెందలేదు.
1892 సంవత్సరంలో ట్రినిటీ తరఫునుంచి క్రికెట్ ఆడటం జరిగింది, కానీ ఎవరు కూడా తన ఆతని పట్టించుకోలేదు. నెట్స్ లో ఎక్కువ సేపు సాధన చేసేవారు రంజిత్ సింహ్జి. 1893 సంవత్సరంలో కేంబ్రిడ్జి తరపున ఫస్ట్ క్లాస్ క్రికెట్ లో అడుగుపెట్టారు. 9వ స్థానంలో దిగి 18 పరుగులు చేశారు. ఆ తరువాత తన ప్రదర్శన మెరుగవడం ప్రారంభించింది.
ఆస్ట్రేలియా సిరీస్ మరియు పేరు మార్పు
ఆస్ట్రేలియా జట్టు తో ఓడిపోయిన ఒక మ్యాచ్ లో మొదటి ఇన్నింగ్స్ లో 58 పరుగులు మరియు రెండో ఇన్నింగ్స్ లో 37 పరుగులు సాధించి ప్రేక్షకుల చేత జేజేలు పలికించుకున్నారు రంజిత్ సింహ్జి. ఒక సీజన్ ముగిసిన తరువాత రంజిత్ సింహ్జి గణాంకాలు ఇలా ఉన్నాయి, బ్యాటింగ్ సగటు 29.90 మరియు స్లిప్స్ లో ఫీల్డింగ్ చేస్తూ 19 క్యాచులు పట్టుకుని అందర్నీ ఆశ్చర్యపరిచారు.
క్రికెట్ లో రంజిత్ సింహ్జి విజయంతో తనకు మరింత ఆదరణ లభించింది. రంజిత్ సింహ్జి అని పలకడం ఇబ్బందిగా ఉందని తన స్నేహితులు రంజీ పేరుతొ పిలవడం మొదలుపెట్టారు. చివరివరకు ఆ పేరు ఉండడం విశేషం. రంజిత్ సింహ్జి ఎంత గొప్పగా ఆడిన కూడా ఇంగ్లాండ్ జట్టు ఆడుతున్న టెస్ట్ సిరీస్ లో మొదటి టెస్ట్ మ్యాచ్ లో చోటు కల్పించలేదు.
ఆ తరువాత రెండవ టెస్ట్ ,మ్యాచ్ కోసం జట్టుని ఎంపిక చేసింది మరో కొత్త కమిటీ. ఆ కమిటీ రంజిత్ సింహ్జి పేరుని జట్టులో చేర్చడం జరిగింది. 1896 సంవత్సరంలో టెస్ట్ మ్యాచ్ లో ఆస్ట్రేలియా జట్టు మీద మొదటి మ్యాచ్ ఆడారు రంజిత్ సింహ్జి. ఈ మ్యాచ్ లో తాను శతకం సాధించినా కూడా ఇంగ్లాండ్ జట్టు ఓడిపోయింది.
ఈ మ్యాచ్లో శతకం సాధించిన రంజిత్ సింహ్జి ఆటకి ప్రేక్షకులు మరియు ఆస్ట్రేలియా ఆటగాళ్లు ఆశ్చర్యపోవడం జరిగింది, కానీ తన సొంత జట్టు ఆటగాళ్లకు రుచించలేదు.
పరుగుల వరద
1897 సంవత్సరంలో ఆస్ట్రేలియా టూర్ కోసం మ్యాచ్ ఆడటానికి వెళ్లడం జరిగింది. అక్కడ సిరీస్ ప్రారంభానికి ముందు ఫస్ట్ క్లాస్ మ్యాచ్ లో ఆడి రాణించడం జరిగింది. 60.89 సగటుతో 1,157 పరుగు చేశారు. ఇక టెస్ట్ సిరీస్ మొదలయ్యాకా శతకాలు, అర్ధశతకాలతో చెలరేగి ఆడారు. ఆ తరువాత ఒక మ్యాచ్ లో అత్యధిక స్కోర్ చేసి ఇంగ్లాండ్ తరపున ఎక్కువ స్కోర్ చేసిన మొదటి ఆటగాడిగా పేర్కొన్నారు. ఈ మ్యాచ్ లో ఇంగ్లాండ్ జట్టు గెలిచింది మరియు ఈ సిరీస్ లో ఇంగ్లాండ్ జట్టు ఒకటి గెలిచి 4 మ్యాచ్లు ఓడిపోయింది.
1899 సంవత్సరం లో ఆస్ట్రేలియా జట్టుతో జరిగిన మ్యాచ్ లో తన ఆటతో మ్యాచ్ డ్రా గా ముగిసింది. జూన్ మరియు ఆగష్టు నెలలో జరిగిన కౌంటీ క్రికెట్ లో 1,000 పరుగులు చేశారు రంజిత్ సింహ్జి. అంతకుముందు ఎవరు కూడా ఇన్ని పరుగులు చేయలేదు. ఫస్ట్ క్లాస్ సీజన్ లో 63.18 సగటుతో 3,159 పరుగులు చేశారు మరియు 8 శతకాలు ఉండటం విశేషం.
సారధి భాద్యతలు, చివరి సిరీస్
1899 సంవత్సరంలో సస్సెక్స్ జట్టుకి రంజిత్ సింహ్జిని సారధిగా నియమించడం జరిగింది. తన సారధ్యంలో జట్టుని విజయవంతంగా ముందుకు తీసుకెళ్లారు. బౌలింగ్ మరియు ఫీల్డింగ్ లో కొత్త పద్ధతులు అమలు చేస్తూ జట్టుని ముందుకు నడిపించారు రంజిత్ సింహ్జి. 1900 సంవత్సరంలో జరిగిన ఫస్ట్ క్లాస్ క్రికెట్ సీజన్లో పరుగుల వరద సృష్టించారు రంజిత్ సింహ్జి. అర్ధ శతకాలు, శతకాలు మరియు డబల్ సెంచరీ చేసి ఎక్కువ పరుగులు చేసిన ఆటగాడిగా రికార్డు సృష్టించారు.
1902 సంవత్సరంలో వ్యక్తిగత కారణాలతో కొన్ని మ్యాచ్లకి దూరం అవ్వడం ఇంకొన్ని మ్యాచ్లు ఆడిన కూడా సంతృప్తి లేకపోవడం జరిగాయి. 1903 సంవత్సరంలో జరిగిన ఫస్ట్ క్లాస్ క్రికెట్ సీజన్ లో రంజిత్ సింహ్జి 56.58 సగటుతో 1,924 పరుగులు చేయడం జరిగింది. అన్ని పరుగులు చేసినా కూడా తన మీద నమ్మకం తానే కోల్పోయి సారధ్యా పదవికి రాజీనామా చేశారు.
1904 సంవత్సరంలో పరుగుల వరద సృష్టించారు రంజిత్ సింహ్జి. 1920 సంవత్సరంలో తన చివరి ఫస్ట్ క్లాస్ మ్యాచ్ ఆడటం జరిగింది. మొత్తానికి 56.37 సగటుతో 24,692 పరుగులు సాధించారు ఫస్ట్ క్లాస్ క్రికెట్ లో.
రంజిత్ సింహ్జి భారత దేశం వచ్చినప్పుడు క్రికెట్ కోసం ఏదైనా అభివృద్ధి కార్యక్రమం కానీ క్రికెట్ క్రీడాకారులను ప్రోత్సహించమని కోరినా నిరాకరించారు, కానీ భారత క్రికెట్ బోర్డు మాత్రం క్రికెట్ ఆడిన మొదటి భారతీయుడు రంజిత్ సింహ్జి కాబట్టి గౌరవంతో తన పేరు మీద రంజీ ట్రోఫీ ప్రారంభించి క్రికెట్ ఆడటం విశేషం. 1933 సంవత్సరం ఏప్రిల్ 2న గుండెపోటుతో రంజిత్ సింహ్జి మరణించారు.
గణాంకాలు
టెస్ట్ క్రికెట్: రంజిత్ సింహ్జి తన క్రికెట్ జీవితంలో మొత్తం 15 అంతర్జాతీయ టెస్ట్ మ్యాచ్లు అడగా అందులో 44.95 సగటుతో 989 పరుగులు సాధించారు మరియు 2 శతకాలు, 6 అర్ధ శతకాలు సాధించారు అంతేకాకుండా తన అత్యధిక స్కోర్ వచ్చేసి 175. ఇక బౌలింగ్ విషయాన్ని వస్తే మొత్తం 97 బంతులు వేసి 39.00 సగటుతో ఒక్క వికెట్ పడగొట్టారు మరియు అత్త్యుత్తమ బౌలింగ్ వచ్చేసి 1/23 అలాగే 13 క్యాచ్లు అందుకున్నారు.
ఫస్ట్ క్లాస్ క్రికెట్: రంజిత్ సింహ్జి తన క్రికెట్ జీవితంలో మొత్తం 307 ఫస్ట్ క్లాస్ క్రికెట్ మ్యాచ్లు ఆడి 56.37 సగటుతో 24,692 పరుగులు సాధించారు మరియు 72 శతకాలు, 109 అర్ధ శతకాలు ఉండటం విశేషం అంతేకాకుండా తన అత్యధిక స్కోర్ వచ్చేసి 285*. ఇక బౌలింగ్ విషయానికి వస్తే 8,056 బంతులు వేయగా 34.59 సగటుతో 133 వికెట్లు పడగొట్టారు మరియు అత్త్యుత్తమ బౌలింగ్ వచ్చేసి 6/53. నాలుగు సార్లు ఇన్నింగ్స్లో 5 వికెట్లు పడగొట్టారు రంజిత్ సింహ్జి మరియు 233 క్యాచ్లు అందుకోవడం విశేషం.